فن
من ديوان 7 ألوان للضل للشاعر يحيى سمير كامل
بقلم – يحيي سمير كامل
ولو أختار ما بين اتنين
ما بين الدنيا وعيونك
تكون عينك بدون تفكير
يا حلم قديم
بيتشقلب في تكويني
و يغطس جوه بير قلبي
ولا يطلعش
يا حلمي يا اللي عمري في يوم
ما كنت أتخيّل إنه يكون
وأكون مجذوب وميت عاشق
وأكون درويش
في حضرة ضحكتك ليا
يا غنوة بتنتحر فيا
وأنا فيها بأكون مقتول
عشقت الآهة والدمعة
وعد حروف كتاب بقراه
عشان ألقاه
بيتبسم ويضحك ليا ويقول لي
حبيبك جاي بيعافر
عشان يوصل ويغرق فيك.
